Хүйтний эрч эрс чангарсан өдрүүдээр хувь, хувьсгалын хоёр станцын үйл ажиллагаа доголдож, улс даяар цахилгаан эрчим хүчний хэрэглээг хязгаарлах нөхцөл үүссэн билээ.

IV ДЦС-ын наймдугаар зуухыг албадан хөргөж, +70 хэмийн өндөр температурын орчинд яаралтай засвар хийж, 18 цагийн дотор бүрэн гүйцэтгэснээр 2026 оны нэгдүгээр сарын 21-ний өдрөөс зуух хэвийн горимоор ажиллаж эхлээд байгаа. Гэвч тус станцын долдугаар зуухыг яаралтай засварлахаас аргагүй нөхцөл байдал үүссэнээр 26-ны өдрийн 22 цагт зогсоосон юм. Ингэснээр 100 МВт орчим буюу 20,000 айлын хэрэглээг хязгаарлана гэдгийг ДҮТ-өөс мэдэгдсэн. Долдугаар зуухны засварыг 29-ний өглөө 06 цагт дуусгаж, хэвийн горимд шилжүүлэхээр төлөвлөсөн байна. 

Тэгвэл Бөөрөлжүүтийн цахилгаан станцын нүүрс тэжээх бункерт нүүрс хөлдөж, бөглөрөл үүссэнтэй холбоотойгоор станцын ачаалал 300 МВт-аас буураад байна. 

Ерөнхий сайд Г.Занданшатарыг Бөөрөлжүүт цахилгаан станцад ажиллах үеэр буюу нэгдүгээр сарын 24-ний өдрийн 11-12 цагт тус станц 300 МВт ачаалласан хэрнээ түүнээс хойш бүрэн хүчин чадлаараа нийлүүлэлт хийгээгүй байна. Тухайн өдөр Ерөнхий сайд “Диспетчерийн үндэсний төв” ТӨХХК-д ажиллахдаа “Бөөрөлжүүт цахилгаан станц нийлүүлэлтээ суурилагдсан чадалдаа (300 МВт) барина гэж мэдэгдсэн”-ийг онцолсон. 

“Бөөрөлжүүт цахилгаан станц  24-ний өдрөөс хойш хамгийн ихдээ 251 МВт ачаалал авсан бол өнөөдөр 12 цагийн байдлаар 53 МВт болтлоо буурчээ. Энэ нь тус станцын хүчин чадлын ердөө 17.6 хувь юм. Хэрвээ Бөөрөлжүүт цахилгаан станц бүрэн хүчин чадлаараа эрчим хүч нийлүүлэхгүй бол импорт болон хязгаарлалт нэмэгдсээр байх болно. Тухайлбал, өнөөдөр хамгийн сүүлд Диспетчерийн үндэсний төвөөс авсан мэдээллээр 16 цагт Бөөрөлжүүт станц 94 МВт ачаалал авсан байна. Үүгээр бол үйлдвэрлэх ёстой байсан 300 МВт-ын зөрүү 206 МВт-ын тодорхой хувийг импортоор ОХУ-аас авах, эсвэл хязгаарлана гэсэн үг юм. 

Гэрээний үүргээ биелүүлээгүйгээс үүдэлтэй энэхүү импортын эрчим хүчний зардлыг Бөөрөлжүүт станц төлөх эсэх нь сонирхолтой юм. Жилийн дөрвөн улирал, эрс тэс уур амьсгалтай Монгол Улсад цахилгаан эрчим хүч үйлдвэрлэх станцын хувьд 46 хувийн чийгшилтэй нүүрсний хөлдөх эрсдэлийг тооцоолоогүй нь хачирхалтай. 

Бөөрөлжүүт цахилгаан станцын нэгдүгээр сарын 20-27-ны өдрийн ачаалал